Kòrsou su tradishon di ka’i òrgel. Serapio Pinedo i un laso ku La Guajira, Colombia. Por: Ieteke Witteveen (Curazao)

Kòrsou su tradishon di ka’i òrgel. Serapio Pinedo i un laso ku La Guajira, Colombia

                                       

Por: Ieteke Witteveen 

Sin duda un di fiestanan mas bunita di Kòrsou tabata — i ainda ta — esun di ka’i òrgel. Baliamentu elegante riba tononan di e kaha di músika, akompañá pa e instrumènt rítmiko wiri, ta un di e selebrashonnan kultural mas dushi ku pueblo di Kòrsou i Aruba a mantené te dia di awe.

Fo’i siglo 19 te awor, den stat i na kunuku, pueblo a balia wals, tumba, mazurka, danza, joropo, cumbia, fox — tur riba e melodia ku ta sali for di e kaha mágiko akí.

Ka’i òrgel a drenta promé den salòn elegante di hende riku na Willemstad, kaminda tabata kustumber di piano i muzik di kuèrdè. Den barionan popular i na kunuku tabatin tambú i seú, i muzik di zumbi pa balia.

Yegada di ka’i orgel na Kòrsou 

Ka’i òrgel a yega Kòrsou na kabamentu di siglo 19 via Venezuela; Horacio Sprock (1866–1949), un yu di Kòrsou bibá na Barquisimeto, Venezuela a trese kai ‘òrgel Kòrsou. Komo komersiante, Horacio tabata biaha hopi bai Venezuela. Na Barquisimeto el a topa un Italiano ku tabata traha ka’i òrgel.

Aunke e instrumènt ta di orígen europeo (Italia), na Kòrsou el a haña un toke outéntiko krioyo: pueblo afro-curazoleño a añadí wiri, un instrumènt di metal di orígen afrikano, ku a duna ka’i òrgel su propio ritmo i su alma popular. 

Ora tin hasimentu di aña, boutiso, risibimentu o kasamentu — semper ora tin pleizi i alegria — tabatin ka’i òrgel. 

John de Pool kende a tradusí ka’i òrgel komo organillo de manubrio a yega di bisa: “La clase alta, la mediana y el pueblo hicieron un completo éxito del organillo” (De Pool, Del Curazao que se va, 1935).

E promé areglistanan di ka’i òrgel na Kòrsou tabata Horacio Sprock mes i Rudolf (Dòdò) Palm (1880–1950). Alrededor di 1938 Rufo Wever na Aruba a kuminsá eksperimentá ku ka’i òrgel. 

Na dékada kuarenta i sinkuenta ka’i òrgel a pèrdè su popularidat pa motibu ku muzik kubano a kue tereno. Ora Ora Horacio Sprock i Dòdò Palm  rumannan Sprock i a fayesé, a sera e tayer; e silinder kibránan a keda ei, te na momento ku a bira konosí ku e músiko Rufo Wever na Aruba a logra drecha silinder i klaba muzik nobo pa ka’i òrgel. E tempu ei tokadónan di ka’i òrgel manera Frederik ‘Fedjai’ Leito i Yuchi Rosenda a manda nan silindernan pa Rufo Wever drecha. 

Den e mes tempu ei na Kòrsou a surgi  konosedó nobo di ka’i òrgel: Serapio Pinedo.

Serapio ‘Shapo’ Pinedo  i un laso familiar ku La Guajira

Serapio Augustín Pinedo (1922–2021) ta yu mas chikí di un famia grandi di Rosalia Pinedo, ku su orígen familiar di parti di mama ta yega te Riohacha, La Guajira. 

Serapio tabata un hòmber mashá respetá na Bándabou. E tabata karpinté di fishi, skreinwèrker/ ebanista, músiko i lider spiritual, i el a dediká su bida na preservá i amplia e tradishon di ka’i òrgel. Ora e tabatin apénas 18 aña, el a traha su promé ka’i òrgel. El a siña mirando kon Cornelis Sprock na su tayer den bario di Jongbloed, ta klaba muzik riba silender. 

E a kontami: “Ora mi a mira kuantu klabu tin riba e papel, mi a komprendé kiko ta kiko.”

Despues e mes a diseñá un hèrmènt pa klaba ritmo eksakto, ku yama kuadrant. Ke men ku kuadrant  ta un invento di e propio Serapio. 

Ora muzik kubano a tuma tereno na fiestanan di Kòrsou na dékada 40 i 50 di siglo binti ka’i òrgel a pèrdè popularidat. Pero Serapio no a desistí di sigui traha. Sin formashon musikal formal, sin sosten finansiero, el a perseverá. Na 1964 el a logra presentá su promé ka’i òrgel ku silinder ku músika baliabel. El a batisá e ka’i òrgel ku e nòmber  Migali, dediká na su yu muhé menor. 

Ora na dékada 90 mi tabata dokumentá e konosementu di Serapio Pinedo, el a traha 35 òrgel kaba. Despues el a haña ánimo pa sigui traha mas ka’i orgel. Na final di su bida su produkshon total tabata 65 ka’i òrgel ku nan silinder di muzik. 

Afortunadamente el a duna kurso na hende yòn i hende grandi pa evitá ku su konosementu di e herensia úniko di Kòrsou akí ta bai pèrdí. 

Ora Serapio a kumpli 90 aña, el a ekspresá su gran deseo: mantené  su herensia bibu den forma di un museo. Na 2016, huntu ku su yu muhé Migali Pinedo i  su kasá Elfried Koots, su ñetu Aisha Gressman i amigunan kultural, el a funda fundashon Museo Ka’i Òrgel Shapo na Leliënberg, Bándabou, na e mes lugá kaminda el a traha tur su ka’i òrgelnan:  na su tayer na Leliënberg. 

Na okashon di selebrashon di 150 aña ‘casa Pinedo-Deluque’ na Riohacha, Colombia organisá pa Natasha Pinedo, a rekuperá huntu ku músiko i primo Leonardo Pinedo na partitura di e wals Morir Soñando di e kompositor colombiano Elias Pinedo Mendoza. Migali Pinedo a logra eternalisá e wals akí riba un silinder di ka’i òrgel na Kòrsou. 

Ka’i òrgel ta forma asina un símbolo di alma kreativo krioyo di  un resistensia musikal ku pueblo di Kòrsou ta kompartí ku nos rumannan di Caribe.

Ta e ekspreshon ku nos ta anhelá hermandat i mas union den nos region di Karibe. 

Kòrsou, Nòvember 2025  

Inchi Witteveen

 

Ilustrashon;  

 

Silinder

Ta traha e silinder preferiblemente di mahòk, ta form’é ku ocho pida palu ku ta leim na otro. Ta traha riba e pida palunan ku beitel. Ta usa un draaibank pa hasi e silinder rondó. Midí di un silinder ta 55,5 cm. E korona mester kontené 64 djente, esaki ta determiná ku un tokadó mester drei e man 64 biaha pa e yega kaminda e komposishon ta kuminsá. Tin silinder dòbel i silinder ènkel, sea ku 64 òf ku 48 djente, pa motibu ku e silinder akí ta ripití final di un komposishon. Baliadónan ta gusta silinder di 64 djente, pasobra esakinan ta ripití parti di un komposishon. Un silinder dòbel ta kontené 6000 òf 7000 klabu, miéntras un ènkel ta kontené 5000. E kantidat eksakto ta dependé di e manera ku un areglista ta floria un piesa. Kada silinder ta karga 8 piesa musikal i ta p’esei tokadónan ta hiba 2 òf 3 silinder fiesta. Tantu mas hundu un klabu ta klabá den e silinder, mas dushi e ta zona.