Crecemento y Liderazgo. Por: Sue-Ann Lee (Aruba)

CRECEMENTO Y LIDERAZGO

By: Sue-Ann Lee

Rectora Universidad de Aruba

 

Den un mundo cu tur dia ta evoluciona, nos tin e deber di inspira otro pa por crece ylogra nan soño. Crecemento hopi biaha no ta bin di un area comodidad. E ta nace di momento nan cu menos no ta spera, unda bida ta strek nos mas leu cu nos a pensa cu nos por jega.

Un di e parti mas desafiante di ta un hende muher y mama na mes tempo, ta cu ora nos ta siña ta un mama, nos ta siña lidera tambe, y ta siña acepta ken nos ta den cada fase. Mi por identifica cu hopi hende muhernan: e balansa entre carera y maternidad no ta facil.

E ta jena di decision dificil, momento nan di refleccion, anochi nan di duda, mainta nan di coraje y tur dia buscando forsa nobo.

Maternidad hopi biaha ta wordo describi como algo suave, amoroso y instintivo. Pero pa mi, e ta un di e enseñansa di mas fuerte den mi carera di liderazgo. E ta siña nos pasenshi, resiliencia, presencia, negosha, vulnerabilidad, y hopi amor cu ta amplia nos capacidad. Como mama y profesional nos hopi biaha no ta papia di discomfort, e miedo nan, e momento nan unda ambicion y cansansio ta man den man, unda nos identidad ta sinti fragil y ora ta parse cu nos mester escohe entre un y otro. 

Pero mi kier comparti algo: discomfort no ta señal di fayo, e ta señal di transformacion. E momento aki ta siña mi pa acepta mi mes: como un mama cu ta cuida, y un lider cu ta guia. No tabata cuestion di scohe cua ta mas importante, sino pa tin  e Valentia pa kere cu tur dos ta posibel. 

Aceptacion propio ta mi inspiracion. Den mi viahe, mi a  siña pone limite, pidi ayudo, y haña pas pa compronde cu crecemento por ta disordena, pero e profundo y jen di sentido. Ta un mama de cuatro yui no a stop mi liderato;  e a transforma mi manera di lidera. E a atrae claridad, compasion, proposito, y liderato mas humano den mi. 

Nos ta no ta crece pa escohe nos mesun caminda,  nos ta crece pa acepta ken nos ta y ken nos ta bira. Den e aceptacion tin poder.  Y den discomfort, nos ta renase y nos ta bira mas fuerte.